UFA býður til Akureyrarmóts í frjálsíþróttum á Þórsvellinum á Akureyri helgina 18.-19. júlí. Mótið er fyrir alla aldursflokka. Skráðir keppendur eru um 120, þar af eru 23 Skagfirðingar.

Sumarmót UMSS í frjálsíþróttum var haldið sunnudaginn 12. júlí. Keppendur voru frá 12 ára aldri upp í fullorðinsflokka. Góður árangur náðist og er þar helst að nefna, að Daníel Þórarinsson UMSS stórbætti sinn fyrri árangur í 100m, 200m og 400m hlaupum.

Sumarmót UMSS í frjálsíþróttum verður haldið á Sauðárkróksvelli sunnudaginn 12. júlí og hefst það kl. 13:00. Keppt verður í 100m og 200m hlaupum, langstökki, hástökki, kúluvarpi og spjótkasti. Mótið er opið öllum 12 ára og eldri.

Meistaramót Íslands í frjálsíþróttum, fyrir 11-14 ára, fór fram á Selfossi helgina 27.- 28. júní. Stefanía Hermannsdóttir náði bestum árangri Skagfirðinga á mótinu, en hún varð í 2. sæti í spjótkasti 12 ára stúlkna, kastaði 24,13 m.

Íslenska frjálsíþróttalandsliðið keppir nú um helgina, 20.-21. júní, í 2. deild Evrópukeppni landsliða, sem fram fer í Stara Zagora í Búlgaríu. Skagfirðingar eiga einn fulltrúa í íslenska liðinu nú, Þóranna Ósk Sigurjónsdóttir var valin til keppni í hástökki kvenna.

Smáþjóðaleikarnir í iþróttum standa nú yfir í Reykjavík. Þóranna Ósk Sigurjónsdóttir keppti í hástökki fyrir íslenska frjálsíþróttalandsliðið. Hún varð í 4.-5. sæti, fremst íslensku keppendanna í greininni, stökk 1,65m, sem er nálægt hennar besta árangri. Jóhann Björn Sigurbjörnsson, sem valinn var í íslenska liðið í spretthlaupum, gat því miður ekki keppt, vegna meiðsla sem hann varð fyrir skömmu fyrir leikana.

Frjálsíþróttadeild Tindastóls hefur birt æfingatöflu sína fyrir sumarið 2015. Þjálfarar eldri flokks eru Sigurður Arnar Björnsson og Vilborg Þórunn Jóhannsdóttir, en yngri flokk þjálfar Gestur Sigurjónsson.

Smáþjóðaleikarnir fara fram á Íslandi dagana 1.- 6. júní. Tveir Skagfirðingar hafa verið valdir til keppni í íslenska frjálsíþróttaliðinu, Jóhann Björn Sigurbjörnsson keppir í 100m hlaupi og boðhlaupum, og Þóranna Ósk Sigurjónsdóttir keppir í hástökki.

Frjálsíþróttaráð UMSS heldur páskamót í frjálsíþróttum í Íþróttahúsinu í Varmahlíð laugardaginn 11. apríl og hefst það kl.13.

Hópur frjálsíþróttafólks úr UMSS er nú staddur í æfingabúðum í Athens í Georgiu í Bandaríkjunum. Æfingar ganga vel og allt gott að frétta.