Fyrri hálfleikurinn var langt frá því að vera góður hjá Tindastólsmönnum og staðan í hálfleik sanngjörn þar sem heimamenn leiddu með einu marki.

Það var hins vegar allt annar bragur í Tindastóli í seinni hálfleik og líklega hefur Siggi lesið þeim pistilinn.  Eftir ekki margar mínútur fékk Tindastóll vítaspyrnu eftir að boltinn fór klárlega í hendi leikmanns Ýmis.  Aðalsteinn Arnarson tók spyrnuna og skoraði örugglega og jafnaði leikinn.  Ingvi Hrannar kom svo Tindastóli yfir með góðu skoti með hægra fæti í fjærhornið eftir að hafa spólað sig í gegn frá vinstri vængnum.  Tindastólsmenn bökkuðu aðeins við þetta og Ýmir náði að jafna leikinn í 2-2.

Þá kom gullsending frá Alla innfyrir á Arnar sem skaust í gegn og lyfti boltanum yfir markvörð Ýmis sem kom út á móti honum.  Þarna komst Tindastóll í 2-3 og ekki mikið eftir.  Tindastólsmenn bættu frekar í en hitt og Kristinn Aron sem kom inná sem varamaður skallaði boltann í netið eftir hornspyrnu og gulltryggði 3 mikilvæg stig.

Leikmenn Tindastóls náðu að rífa sig upp eftir síðasta leik og slakan fyrri hálfleik og sýndu svo sannarlega úr hverju þeir eru gerðir.  Afar mikilvæg þrjú stig í húsi en stutt í næsta leik sem verður á þriðjudaginn á Sauðárkróksvelli.  Þá koma Borgnesingar í heimsókn en þeir unnu Tindastól í leik liðanna í Borgarnesi fyrr í sumar.