Sunneva Jónsdóttir sundkona Tindastóls keppir um helgina á Actavis International sundmótinu sem fer fram í Ásvallalaug í Hafnarfirði 11. - 13. júní.  Hún mun keppa í 100m og 200m baksundi fyrir Tindastól.  Henni var boðið að keppa á þessu skemmtilega móti og þess má geta að hún er að stefna á að ná lágmörkum í baksundinu fyrir AMÍ, sem fer fram 24.júní-27.júní í Ásvallalaug í Hafnarfirði.

6 þjóðir keppa í sundi á Actavis International. Sundmeistaramót Evrópska Smáþjóða/Actavis International sem nú er  haldið í annað sinn í Ólympísku lauginni að Ásvallalaug í Hafnarfirði um helgina. Þetta mót er haldið annað hvert ár á milli Smáþjóðaleika.   Um 130 keppendur frá 6 þjóðum munu etja kappi í lauginni. Þar verða keppendur frá San Marino, Andorra, Luxemborg, Færeyjum, Danmörku og Íslandi. Sum lönd komust ekki vegna áhyggjufullra foreldra um eldgos.  Landslið Íslands saman stendur af 35 sundmönnum og má þar helst nefna Ragnheiði Ragnarsdóttur, Hrafnhildi Lúthersdóttur, Bryndísi Rún Hansen, Birki Má Jónsson og Hrafn Traustason.  Forseti Evrópska Sundsambandsins “LEN” Hr. Nory Kruchten frá Luxemborg mun veita mótinu sérstaka heiðursheimsókn. Mótið hefst með undanrásum á laugardaginn klukkan 10 og úrslit úr þeim hluta verða síðar um daginn eða klukkan 3. Sama tímaáætlun gildir á sunnudaginn. Okeypis aðgangur er að mótinu.